Regionda ilk dəfə HIMSS sertifikatını əldə etdik!
By: Admin
Təxminən 2 il bundan öncə Türkiyənin Antalya şəhərində təşkil edilən HIMSS Avrasiya 2022 sərgisində iştirak etdik. Sərgi zamanı dünya səhiyyəsində baş verən önəmli rəqəmsal transformasiyalar ilə tanış olmaq imkanımız yarandı. Daha sonra əldə etdiyimiz məlumatları detallı araşdırıb, beynəlxalq təcrübəni daha dərindən öyrəndik və bu yeniliklərin Ölkəmizin səhiyyəsi üçün də əhəmiyyətli dərəcədə vacib olduğuna inandıq. Araşdırmalarımızın nəticəsini və həyata keçirmək istədiyimiz layihəni İcbari Tibbi Sığorta üzrə Dövlət Agentliyi və TƏBİB rəhbərliyi ilə bölüşdük. Hər iki Qurumun rəhbərliyi təkliflərimizə böyük diqqət göstərdi və icrasında bizi tam dəstəklədiklərini bildirdilər. Beləliklə TƏBİB-in tabeliyində olan “Yeni Klinika” PHŞ üçün HIMSS təşkilatının EMRAM modulu üzrə 6-cı səviyyə akkreditasiya sertifikatının alınması layihəsinə başlanılmasına qərar verildi. Sözügedən layihənin icrası komandamız üçün böyük məsuliyyət eyni zamanda qarşıya qoyulan əhəmiyyətli bir çağırış idi.
İlkin mərhələdə Yeni Klinikada detallı araşdırma işləri aparıb, klinikanın sertifikasiyanın tələblərinə nəzərən cari vəziyyətini müəyyənləşdirdik. Çox xoş bir hal idi ki, əksər tələblər artıq Yeni Klinikada mövcud idi. Buna zəmin yaradan əsas səbəb isə məhz 2018 -ci ildən başlayaraq icbari tibbi sığortanın tətbiqi çərçivəsində həyata keçirilən böyük miqyaslı elektronlaşdırma işləri idi. Daha sonra çatışmayan tələblərin təmin edilməsi üçün “Rəqəmsal Tibbi Həllər” MMC və Yeni Klinikanın icraçı komandası layihə ilə bağlı səfərbər oldu və layihənin fəaliyyət dövründə gecə-gündüz əzmlə çalışdı. Layihə boyunca olduqca çətin yoldan keçdik. Beynəlxalq təcrübənin daha dərindən öyrənilməsi üçün layihənin icraçı komandasının üzvlərinin bundan öncə bu sertifikatı əldə etmiş ölkələrə səfərləri təşkil edildi. Sertifikasiyanın tələblərinin təmin edilməsi çərçivəsində biznes proseslərin elektronlaşdırılması, 95 faizin üzərində kağızsız tibbi qeydiyyatın təmin edilməsi və sairə əhəmiyyətli işlər icra etdik. Ən vacib tibbi cihazların elektron sistemlərə inteqrasiyasını təmin etdik. Və artıq müvafiq sertifikatın alınmasına hazır idik. Beləliklə 29.02.2024-cü il tarixində HIMSS təşkilatının müvafiq komissiyası tərəfindən yoxlamalar aparıldı və 10 saatdan artıq aparılan yoxlamalar zamanı Yeni Klinikanın demək olar ki, əlaqəli bütün istiqamətlərinin iş prosesi detallı izlənildi, həmçinin klinikanın personalı ilə müsahibələr təşkil edildi. Yoxlamaların yekunu olaraq komissiya tərəfindən verilən qərara əsasən Yeni Klinikanın EMRAM modulu üzrə 6 səviyyə sertifikasiyanın tələblərinə uyğun olduğu təsdiqləndi. Həmçinin Yeni Klinika ilə bağlı məlumatlar HIMSS təşkilatının rəsmi veb səhifəsində yerləşdirildi. Onu da qeyd edim ki, bu sertifikat Cənubi Qafqaz və Şərqi Avropa regionunda ilk dəfə olaraq Yeni Klinika tərəfindən əldə edilib. MDB məkanında isə buna qədər yalnız Rusiya Federasiyasının iki tibb müəssisəsi tərəfindən qazanılmışdır.
